بەروار :2017/01/04 سەردان: 65

لە کۆلێجی زمان وەك گەورەترین پڕۆگرامی گەشەپێدانی مرۆیی و بەرزكردنەوەی تواناكان راگەیەنرا ( UHD TALKS)


 

ئەمڕۆ ١٨ی كانونی یەكەمی ٢٠١٦ یەكەمین سیمپۆزیەمی كۆلێجی زمانی زانكۆی گەشەپێدانی مرۆیی بەڕێوەچوو بە ناونیشانی (سەركردایەتی گەنجان) وەك دەستپێكی راگەیاندنی پڕۆگرامی UHD TALKS كە پڕۆژەیەكی ناوازەی كۆلێجی زمانە و تایبەتە بە گەشەپێدانی مرۆیی و بەرزكردنەوەی تواناكان و لە زنجیرەبەك سیمپۆزیەمدا بەرجەستە دەبێت. سیمپۆزیەمەكەی ئەمڕۆ زۆر جیاواز بوو. سێ راهێنەر و كەسایەتی كاریگەر و بە توانا ئەزموونی سەركەوتنی خۆیان بۆ خوێندكارەكان و ئامادەبووان گێڕایەوە. هەر یەك لە بەڕێزان عبدالسلام مەدەنی (راهێنەری نێودەوڵەتی و بەڕێوبەری گشتی رێكخراوی روانگە) و شاسوار عبدالواحد (دامەزرێنەر و خانوەنی گروپی كۆمیانیاكانی نالیا) و خاتوو نیهاندینی سەینتی (دامەزرێنەر و بەڕێوبەری رێكخراوی IMPACT - IRAQ) میوان و پێشكەشكاری سەرەكی سیمپۆزیەمەكە بوون. ئەوان لە بابەتەكانیاندا بە روونی ئەزموونی سەركەوتنی خۆیان گێڕایەوە و ئاماژەیان بە هەوراز و نشێوی سەر رێگایان كرد. باسیان لە خەونەكانیان كرد بۆ ئەنجامدانی گۆڕانكاری. ئاماژەیان بە گەیشتنیان بە بەشێكی خەونەكانیان دا و لێبڕانیان بۆ بەردەوامی راگەیاند. هانی سەرجەم بەشداربووان و بە تایبەتی خوێندكارە ئازیزەكانیاندا تا بوێرانە رەچەشكێن بن و نەهێڵن ئاستەنگەكان بەر بە بەدیهێنانی خەونەكانیان بگرن. هاوكات بەشداربووان لە بابەتەكانیان بە شێوەیەكی زانستی باسیان لە سەركردایەتیكردن لای گەنجان كرد.

 

تایبەتمەندێتی (UHD TALKS) لە زیندوێتی بابەتەكان و كاریگەری پێشكەشكاران و سەردەمیانەی شێوازەكانیاندا خۆی دەبینێتەوە كە راستەوخۆ بەشداربووان و ئامادەبووان ئاوێتەی بابەتەكان دەبن لەبەر گرنگی و كاریگەریان. لە كۆتایی سیمپۆزیەمەكەدا خەلاتی رێزلێنانی زانكۆی گەشەپێدانی مرۆیی لە لایەن بەڕێز سەرۆكی زانكۆوە بەخشرایە پێشكەشكاران.

 

شایانی باسە، سیمپۆزیەمەكە راستەوخۆ لە لایەن كەناڵی (NRT)یەوە گواسترایەوە و روماڵ كرا.